गोपलो बाल बधाओडा दिन भर चौक रे मायं फिरतौ रैवंतो। सिंझया नै पाटै माथै किस्सा सुणावतौ। लोगां नै हंसवाण रौ काम करतौ । कदै कोई जीसा रै बारै मांय पूछतौ जणै बात टाळ दैवंतो।
चौक रै पाटै माथै आधी दूर तांई तावडो आयग्यो
हो। गोपलो छियां कानी खिसक ग्यो । आपरी दाडी माथै हाथ फैरतो अेकलौ पाटै माथै बैठो
हो। दुपारै रा दो बज्या हा। दुपैर री बगत पाटै माथे कोई कोनी आवै। अैकलो गोपलो
बैठौ रैवे। दाडी बधायोडो अर गुटखा खावंतौ बैठो रैवे। सिंझया नै पाटै माथै महफिल
जमै। चौक रा खास खास लोग चौक रै मायं पाटै माथै आ'र
बैठे। पछे सरू हुए ज्याफ बायडान सूं ले'र मौहतां रै
चौक ताई री बात्यां। पाटै माथै गोपले रै किस्सा री घणी उडीक रैवे। व्हैरा किस्सा
सुणन वास्ते लोग पाटै माथै आवै। आज पाटै पर महफिल जम्योडी ही। गोपलो आप री दाडी
माथै हाथ फैरतो बोल्यो- सरदार । म्है पैला संसोळाव भौत जावंता। तनै क्या बताउं
सरदार। एक बार म्है चौक रा दस बारह जणा गोठ करण वास्ते संसोळाव ग्या। पैला तो
म्है लोग जम*र भांग ली । फैर सागीडी जैसराज री पंधारी अर दई
चैप्यो। रात ने सगळा संसोळाव री धरमसाळा रै मायं ई रैया। रात ने धरमसाळा रै डागळै
सुत्या। डागळे री डोळया भौत छोटी ही। सरदार तनै कांई बताउं। रात नै म्हनै पाणी
री तीस लागगी। म्है उभौ हुयो। म्है देख्यो धरमसाळा रै चारूं कानी शेर ही शैर
हा। म्है तो भायला डर ग्यो। म्है भी भायला दिमाग लगायौ। मुंडै रै मायं पाणी
भरयो। फैर डागळे सूं नीचे धार बणा*र थूकणो सरू
करयो। एक शेर पाणी री धार पकड उपर आवण लाग ग्यो। म्है तो डरग्यो। पण म्है भी
तो ईण चौक रो हो। म्है फैर दिमाग लगायो। शेर डागळे तांई आवण लाग ग्यो जणै म्है
धार बंद कर दी। शैर नीचे जा पडयो। सरदार मजो आयग्यो।
गोपलो रो किस्सो सूण सगळा जणा हंसण लाग ग्या।
अचारजी तो हंसता हंसता लिटण लाग ग्या। गोपलो दिन भी नूवां नूवां किस्सा सूणावतो
रैवे। बत्तीस साल रो हुयग्यो। अैकलौ फिरतो रैवे। चौक री पैली गळी रै मायं रैवे।
घर रै मायं मां अर बैटा दोय जणा रैवे। गोपले रौ ब्यांव अबार तक नीं हुयौ। आ बात
कोयनी कै गोपलो ब्यांव करै कोयनी। गौपनो सारलै चौक रै मायं रैवण वाळी नैनकी सूं
ब्यांव करनौ चावंतौ हो। गोपलै री मां भी राजी ही अर नैनकी रा बाबूसा भी। पण जद
नैनकी नै ठा लागी कै गोपलो कोटगेट रै बारै तो जावै कोयनी। स्यैर रो दरवाजौ हो
कोटगेट। नूंवौ स्येर कोटगेट रै बारे अर पूराणो स्यैर कोटगेट रै मायं बसतो हौ।
नैनकी ब्यांव रौ मना कर दियौ। कैयो जकौ छोरो कोटगेट रै बारै नीं जावै उण सूं म्है
ब्यांव नीं कर सकूं। गोपले कनै ईण बात रो कीं जवाब नीं हो कै व्हौ आगे कोटगेट रै
बारै जासी या नीं।
गोपलौ लारला बीस सालां सूं कोटगेट रै बारै नीं
ग्यो। सकूल अर कालेज री पढाई कोटगेट रै मायं ई करी ही। कालेज रै मायं टॉप करी जणै
ईनाम वास्ते यूनिवरसिटी बुलायौ पण गोपलो नीं ग्यो। गोपले ने छोटा थकां मां कसम
दे दी ही कै तुं कदै भी कोटगेट रै बारै नीं जावैला। गोपले रा जीसा सरकारी नौकर हा।
व्है रोज कोटगेट रै बारै नौकरी माथै जावंता। कोटगेट रै बारै रेल क्रासिंग हो। एक
बार एक हादसै रै मायं गोपले रा जीसा रेल नीचे आयग्या। उण दिन मां औ तय कर दियौ कै
उण रै घर सूं कोई भी कोटगेट रै बारै नीं जावैला। उण दिन बाद गोपला कदै भी कोटगेट
रै बारै नीं ग्यो। गोपले रो सगळो परिवार कोटगेट रै मायं ई रैवंतौ। घर रै मायं मां
अर बेटा दोय जणा ही हा। जीसा री जग्यां गोपले री नौकरी आयी जणै मां मना कर दियौ
गोपलो कोटगेट रै बारै नीं जावैला। उण रौ घर पेंसन रै पीसा सूं चालतौ। नैनकी फैर भी
उडीक राखी कै अैक दिन तो गोपलो कोटगेट सूं बारै जाणै री कसम तोड सी।
गोपलो बाल बधाओडा दिन भर चौक रे मायं फिरतौ
रैवंतो। सिंझया नै पाटै माथै किस्सा सुणावतौ। लोगां नै हंसवाण रौ काम करतौ । कदै
कोई जीसा रै बारै मांय पूछतौ जणै बात टाळ दैवंतो। लारैला दो बरसा सूं नैनकी सूं
बात नी करी ही। नैनकी अबार तक ब्यांव कोनी करिया। गोपलो दिनूगै दिनूगै मां नै
लखमीनाथ जी रा दरसण करवा लावंतौ। गोपलो मां री भौत सेवा करतौ। दाडी बधावडो आपरै
बुशर्ट री बांवा री घुण्डीयां खुली करियोडी ईण दुकार सूं उण दुकान पर बैठौ टैम
पास करतौ। किण सूं भी औछौ नीं बौलतो। कदै कदै गोपलो दुपैर रै मायं चौक रै पाटै
माथै आंख्यां बंद कर पडयो रैवंतो। उण रौ दुख कोई नीं जाणतौ। मां री सेवा जकै रौ
अैक काम हो। चौक रा लोग उण नै साधु मानता। हर एक जणै सूं हंसी मजाक करतौ । गोपले
बिना चौक सूनौ होय जावंतौ। गोपलो चौक छोड ने जावंतौ ई कोयनी।
आवंती आखातीज नै नैनकी रा ब्यांव तय हुयग्या।
गोपलै नै जद आ ठा लागी जणै व्हौ अणमनौ हुयग्यो। घर सूं बारै कोनी निकळतौ। सिंझया
ने पाटै माथै एक आध किस्सा सुणा*र घरै आ
जावंतौ। ज्यूं ज्यूं आखातीज नैडी आवै व्हौ अणमणौ घणौ रैवण लाग ग्यौ। मां री
तबीयत भी खराब रैवण लागगी। डाक्टर साब री दवा कीं काम नीं कर रैयी ही। आखाबीज री
रात मां री तबीयत घणी खराब होयगी। डाक्टर साब कै दियौ अबै मां ने पीबीएम हस्पताळ
लै जाणौ पडसी। पीबीएम हस्पताळ कोटगेट रै बारै ही। मां कोटगेट रै बारै जावण सूं
मना करियो हो। आखातीज नै दिनूगै मां ने बटीडा आवण लाग ग्या। गोपलो डरग्यो। बारै
जा*र टैक्सी ने हैलौ करियो। मां ने उठ*र टैक्सी रै मांय घाली। टैक्सी वाळै नै कैयो-
पीबीएम लै चाल। टैक्सी वाळै फैर पूछयो। फैर गोपलो रीस रै मायं कैयो- चालै नीं।
टैक्सी वाळो टैक्सी दोडावतौ ले ग्यो। हस्पताळ रै बारै टैक्सी रोकी। मां हिलनौ
ढुलनौ बंद कर दियौ। गोपले मां नै दो चार बार हैला करिया। पण मां रै सरीर में कीं
हलचल नीं ही। गोपले री आंख्यां मायं सू पाणी निकळ मां रै माथै पड रैयो हो। टैक्सी
वाळै टैक्सी पाछी चौक कानी मोड ली। चौक रै मांय टैक्सी आ*र खडी होयगी।उण बगत
नैनकी गाडी रै मांय चौक सूं निकळी। गाडी रोकी । गोपले नै टैक्सी सूं बारै निकळते
देख्यो। नैनकी री गाडी रै ड्राईवर गाडी आगे बधा ली। गोपलो टैक्सी रै मांय सूं
बार निकळयो। टेक्सी नै एक हाथ सूं पकडी अर माथौ उंचौ कर*र जोर सूं बाकौ फाड दियो- मां----------------------मां----------------- मां ---------------------
मां----------------------------------------------।
गोपलै री आवाज सुण चौक रै मांय सगळ भैळा हुयग्या।
आज गोपलो कोटगेट सूं बारै निकळयो मां और नैनकी दोनूं छुटग्या।
-------------------------------------
No comments:
Post a Comment